【短篇小论】二巴一分骏威GZ6590F

讲起广州土产嘅村巴仔，大家一定会霖起俗称“骏威仔”嘅GZ6590系列，当中尤其是采用LPG作燃料嘅GZ6950V最令大家深刻，其数量之多，覆盖面之广绝对会令人深刻。今日文中嘅主角——GZ6590F睇落只係采用柴油作为燃料嘅GZ6590V，但事实上佢哋除咗燃料之外重有乜嘢唔同呢？我哋往下睇睇就知道。我哋先提提呢款车嘅数量，跑公交嘅GZ6590F一共出产咗40台，其中三汽有5台(早于2014年11月初报废)，二巴一分一共有35台，而且二巴一分35台车入面又分几个款式，从外观上来睇，多数都係采用类似GZ6590V带有额头式数字线路牌嘅外观(现今有部分车辆因为静态数字式线路牌无件，改用矩阵式电子线路牌)

但係奇怪嘅事又发生了，部分车辆居然采用普通小巴嘅外观，其将线路牌置于车内嘅右上角位置，真係有趣到爆。外观方面，呢款车采用我哋熟悉嘅仿丰田Coaster造型。车身尺寸方面，呢款车嘅长宽高为5940mm×2050mm×2585mm。

不过讲句老实话，呢款车好似从来都冇离开过白云区进行运营，最令人拍手称奇嘅係，当年509呢条长线重用过呢款车来跑全程，真係十分之厉害。(图片来自@烂爆Sam_Wong )

咁从外观睇，点样分辨采用煤气作为燃料嘅GZ6590V同采用柴油作为燃料嘅GZ6590F呢？好简单，从司机位来睇，睇睇空调蒸发器后面係煤气瓶仓门盖定係油箱盖，呢招绝对百分百分辨到出来。而且GZ6590F同普通嘅小巴一样，后舱都係作为行李舱或者工具仓来使用，而GZ6590V嘅后舱装有煤气瓶。

睇睇司机位，都係骏威小巴早期嘅设计，呢种设计带有浓浓嘅“羊城牌”仿丰田Coaster风味。之前都有讲过，GZ6590V嘅制动系统係采用双回路油压制动系统。但係睇睇呢款GZ6590F，居然有个刹车气压表？再睇睇刹车踏板，可以睇到呢款车居然采用卡福出品嘅刹车总阀，从呢两点就可以证明呢款车係采用双回路气压制动系统。

睇睇乘客区，同样都有一样好有趣嘅嘢。头先讲外观果阵可以睇到呢款车嘅外观係分两种造型嘅，其实乘客区嘅座椅布局都分两种，一种係15座布局，令一种係17座布局，同一批车居然有两种座椅布局真係有趣到爆炸。

机械方面，呢款车采用最大功率为85Kw嘅玉柴YC4F115-30国三柴油发动机，搭配星瑞LC5T97C 5速手动变速箱，空调采用松芝SZN。咁问题就来了，点解GZ6590V采用油压式制动系统，而GZ6590F采用气压式制动系统呢？因为GZ6590V采用咗绵阳新晨出品嘅4RB2发动机，呢款发动机改装自汽油发动机，无法喺发动机上面加装打气泵，于是只能采用油压制动系统。而GZ6590F采用玉柴YC4F115-30发动机，呢款发动机係一款柴油机，原厂就带有打气泵，所以便采用气压制动系统。

底盘行走部分，呢款车嘅地台采用二级踏步设计，前后车桥均采用江齿出品，前后桥均采用鼓刹，悬挂采用前三后四钢板悬挂。

头先讲过，呢款车係采用气压制动系统嘅，但係呢批车却有一个好奇怪嘅地方。可以睇到，呢款车嘅后桥居然采用同前桥一样嘅单腔制动气室，由于呢款车冇采用一般嘅双腔制动气室，后桥自然就丧失咗俗称手刹嘅驻车功能。咁一部车肯定要有手刹啦，解决方案係乜嘢？解决方案就係同采用油路制动系统嘅GZ6590V一样，喺传动轴上面装一个用钢丝控制嘅驻车制动鼓，呢个设计真係够晒奇葩。

再来睇睇俾本文主角迟几个月出厂嘅三汽同款车，可以睇到，其后桥同一般采用气压制动系统嘅车一样，安装咗双腔制动气室，并唔需要单独设置一个驻车制动鼓。

最后贴上铭牌，15座同17座布局嘅车都一样为2008年6月制造。