【短篇小论】二巴一分/番广/溢通宇通ZK6105CHEVNPG21

由于最近工作太忙嘅原因，实在係冇咩时间写嘢，翻到屋企就摊喺床上面训觉了，根本冇咩精力上公众号，因为微信公众号与关注者只能喺48小时内互动，好多朋友嘅留言我都冇办法一一回复了，有需要嘅朋友可以再联系一下，多谢！今日嘅主角就係大家之前成日催我发，大财团大批量购入，俗称H10嘅宇通ZK6105CHEVNPG21，点解我拖咗咁耐先发呢，因为呢批车数量有啲多，分到呢批车嘅公司有啲多，上路时间都比较分散。例如打头炮嘅溢通公司，其分获10台新车，自编范围15953-15962，全数运营于565线，不过今次溢通新车上路后因为开通372线增加车辆指标嘅原因，并无报废任何车。

而二巴一分公司今次就分获最多新车，117台新车入面就分获咗68台，自编范围为00093-00146、00148-00161，而且其分布嘅线路都比较散，市区同北郊都有呢款车嘅身影，颇有一种街车嘅感觉。今次呢批新车上路，二巴一分要报废嘅车居然係骏威GZ6590V，小巴车指标换来插电大巴，实为好评！

再将视线转到南边，番广公司今次都分获39台新车，自编范围13819-13857，全数投入到303线及其附属线路303A线进行运营，今次番广报废咗39台车况较差嘅安凯HFF6102GK39。有趣嘅係，虽然係同一批同型号嘅车，但係番广公司嘅车喺附件配置上却大有不同。可以睇到，三间公司嘅新车都采用“借鉴”于Irisbus Iveco Magelys，俗称V面嘅“BRT造型”。除咗番广公司采用唔同嘅空调机较容易分辨之外，二巴一分同溢通公司嘅车都比较难进行分辨，不过都唔係冇办法分出来嘅，睇睇车尾，溢通公司嘅第二巴士标志贴喺发动机仓仓盖上面，而二巴一分嘅第二巴士标志贴喺宇通标旁边。讲开又讲，今次新车嘅长宽高为10500mm×2500mm×3200mm。

睇睇司机位，可以睇到溢通公司同二巴一分嘅车一样，都係采用冇电子信号按钮嘅威帝CAN总线，而番广公司嘅车则采用本安出品嘅混合动力车专用CAN总线，因为CAN系统嘅不同，番广公司嘅车喺部分按钮嘅摆放位置上同溢通公司及二巴一分嘅车有所不同。同样因为CAN系统有所不同，仪表台上嘅独立水箱监控装置都有所不同。

睇睇乘客区，其实布局都係差唔多，都係一踏低入口嘅地台设计，左侧继续因为摆放气罐嘅原因设计成地铁座，右边则留有带残疾人轮椅辅助设施嘅水塘位，同样地，三间公司嘅车都带有残疾人轮椅踏板。

如果係都要讲呢三间公司嘅车有咩唔同嘅话，只能够讲溢通公司同二巴一分嘅车冇咩区别，而番广公司嘅车同呢两间公司嘅车却有不同之处。例如番广公司嘅车采用春山出品嘅世纪之星CS00322座椅，而溢通公司同二巴一分嘅车则采用圳边出品嘅仿九盛造型座椅。番广公司嘅车有一条横向嘅扶手安装于靠前嘅位置，而同一条扶手，溢通公司同二巴一分嘅车则安装于靠近后门嘅位置。

讲讲乘坐感受，其实三间公司嘅车坐起身都差唔多，气囊都係十分松软(对于采用马牌气囊嘅宇通车来讲真係奇迹→_→)，动力算係比较强劲，今次嘅录像录于番广公司嘅车，点解只录佢嘅车呢？因为番广公司嘅车有样好奇怪嘅嘢，当车速超过50之后，仪表台上面嘅CAN总线就会发出报警蜂鸣声，提示当前已超速，可能会损坏电机，呢个对搏命飙车嘅番广司机来讲，真係一个噩梦(建议大家喺WiFi环境下观看视频，土豪请随意)

机械方面，三间公司嘅车都采用最大功率为155Kw嘅玉柴YC6J210N-52国五LNG发动机，搭配峰值功率为147kw嘅宇通自家制YTM280-CV4-L电动机，溢通公司同二巴一分嘅车采用上海松芝SZR-ⅣF-D空调，而番广公司嘅车则采用“国产式电装LD8-DY”——扬州杰信电装DJP-L空调。

底盘行走方面，三间公司嘅车嘅地台都采用一级踏步低入口设计，悬挂采用马牌661N5气囊避震，溢通公司同二巴一分嘅车前后桥均采用方盛出品，前后桥均为双推式刹车夹碟刹，轮圈采用正宇出品嘅亮铝轮圈，轮胎螺丝采用普通轮胎螺丝。

而番广公司嘅车前后车桥均改用东风德纳出品，后桥为免维护桥，前后桥均为双推式刹车夹碟刹，轮圈同样采用正宇出品嘅亮铝轮圈，轮胎螺丝则采用套筒式轮胎螺丝。

最后贴上铭牌，三间公司嘅车均为2016年8月制造。